MALITTARISASSAT
peqatigiiffimmut “ERFALASORPUT” – mut Sisimiuniittumut
Peqatigiiffik ateqarpoq “ERFALASORPUT”
Peqatigiiffiup Sisimiut kommuneat najugaqarfigaa.
Peqatigiiffik aallartinneqarpoq apriilip 16 – ianni 1988.
“Erfalasorput” peqatigiiffiuvoq naalakkersuinermut attaveqanngitsoq, peqatigiiffinnit inunnillu ataasiakkaanit ilaasortaaffigineqartoq. Peqatigiiffiup siunertaraa inuiaat kalaallit nunaminnut erfalasuminnullu asanninnerata kaammattortuarnissaa.Siunertaq tamanna anguniarneqassaaq suliniutitigut makkunuuna:
-Kalaallit erfalasuata ataatsimuussusermut pingaaruteqarneranik erfalasullu eqqortumik atorneqarnissaanik paasisitsiniaanikkut.
-Katinngatinik erfalasunillu peqatigiiffinnut inunnullu ataasiakkaanut peqatigiiffiup tunisisarnissaanut periarfisseeqataanikkut.
Peqatigiiffik “ERFALASORPUT” aqunneqassaaq peqatigiiffimmi siulersuisuinit Sisimiut illoqarfianni qinigaasunit.
Kalaallit Nunaata erfalasuata ilisarnaataanik allanillu tuniniaaneq aaqqissuussinerlu aammalu kalaallit inuiattut ulluata nalliussineqarnerani nalliuttorsiorpalaarsaaneq peqatigiiffiup suliassarai.
“ERFALASORPUT” – p qullersarai ataatsimeersuarnermi ilaasut tassaasut: Siulersuisut, ilaasortat kommuneqarfimmilu peqatigiiffiit Kalaallit Nunaata erfalasuanik katinngatillit aallartitaat. Ataatsimeersuarneq pisassaaq ukioq ataaseq allortarlugu.
“ERFALASORPUT” tallimanik siulersuisoqarpoq.
Siulersuisut peqatigiiffik ataatsimeersuartunut akisussaassuseqarlutik siulersussavaat. Siulersuisut tassaapput: siulittaasoq, siulittaasup tullia, allatsi, aningaaserisoq siulersuisunullu ilaasortaq.
Siulersuisut aatsaat aaliangiisinnaapput ikinnerpaamik ilaasortat pingasut siulersuisut ataatsimiinnerannut ilaappata.
Siulersuisunik qinersineq ataatsimeersuarnermi pisassaaq. Siulittaasoq immikkut qinerneqartassaaq. Siulittaasoq taamatullu siulersuisunut ilaasortat allat ukioq ataaseq allortarlugu qinigaasassapput. Tamatuma saniatigut sinniisissat pingasut qinerneqartassapput.
Qinigaasimasut qinerseqqinnermi qinigassanngorteqqissinnaapput. Siulittaasup saniatigut siulersuisunut ilaasortat qanoq inissinnissartik namminneerlutik isumagisassavaat.
Tatigisaanikkut suliaqarnerit akissarsissutaasassanngillat, tamanna ataatsimeersuarnermi allatut aalajangersaavigineqarsimanngippat.
Ataatsimeersuarnermi oqaluuserisassatut siunnersuutit siulersuisunut apuutereersimassapput kingusinnerpaamik ataatsimiinneq qaammammik ataatsimik sioqqullugu. Oqaluuserisassat tulleriiaarneri – tassa § 7 malillugu – siunnersuutit
tigusimasat naasorsuutillu peqatigiiffiup siulittaasuanit nassiussorneqassapput kingusinnerpaamik ataatsimeersuarnissaq ullunik 14-inik sioqqullugu.
Ataatsimeersuarnermi oqaluuserisassat ukuusassapput:
1. Aqutsisussamik qinersineq
2. Akuerisassanngortitamik nalunaarummik saqqummiineq.
3. Naatsorsuutit akuerisassatut saqqummiunneqarnerat.
4. Siunnersuutinik tigusimasanik oqallisiginninneq
5. Siulersuisunut qinersinerit:
a.siulittaasumik
b.siulersuisunut ilaasortanik
c.sinniisissanik
d.kukkunersiuisussamik
6. Ukiumoortumik ilaasortat akiliutaata aaliangiivigineqarnera aningaasartuu-
tissaajumaartullu oqaluuserineqarnerat.
7. Oqaluuseriumasat allat aaliangiivigisassaanngitsut.
Ataatsimeersuarnermi aaliangigassat tamarmik amerlanerussuteqarnikkut aaliangiivigineqartassapput.
Allalluni taasisoqarnissaa piumasarineqarsinnaavoq.
Ilaasortat 18 – inik ukioqalereersimasut taaseqataasinnaallutillu qinigaasinnaapput.
Ilaasortat ataasiakkaat peqatigiiffiillu Kalaallit Nunaata erfalasuanik katinngatillit sinniisorisaat najuuttut taaseqataasinnaapput.
Ataatsimeersuarnermi siunnersuutip atortussanngortinneqarnissaanut najuuttunit nalinginnaasumik amerlanerussuteqartut isumaqataanerat aaliangiisuusassaaq.
Aaliangiinerit allaattaavinnut allanneqartassapput. Taakku ataatsimeersuarnermi aqutsisumit, allatsimit siulittaasumillu atsiorneqartassapput uppernarsaataasussaallutillu.
Peqatigiiffimmi suliarisat siulittaasumit pisussaassuseqarfittut atsiorneqartassapput. Aningaasanut tunngasut inunnit marlunnit, siulersuisuni taamaaliorsinnaasutut akuerisanit atsiorneqartassapput.
Ukioq naatsorsuuseriffik tassaavoq 1.1. – 31.12.
Juunip sisamaanni pisartussami erfalasuaqqanik tuniniaanermi sinneqartoorutit tamakkerlutik kattuffimmut isertinneqartassapput.
Peqatigiiffik “ERFALASORPUT” aatsaat ataatsimeersuarnermi atorunnaarsinneqarsinnaavoq aaliangiisinnaasut affaat najuuppata taakkualu 2/3-ii taamatut siunnersuummut isumaqataappata. Aaliangeeqataasinnaasut affaat najuutinngippata ataasimeersuariaqqusisoqaqqissaaq. Tamannalu pissaaq siullermiit ullut 14 – it qaangiutsinnagit.
Ataatsimeersuaqqinnermi najuuttut 2/3 – iisa atorunnaarsitsinissaq isumaqatigippassuk „ERFALASORPUT“ atorunnaarsinneqassaaq.
Ataatsimeersuarnermi atorunnaarsitsiffiusumi peqatigiiffiup pigisai aningaasaataalu kattuffimmut pigisassanngortinneqassapput.
Akuerineqarput Sisimiuni 27.2.1997
Aqutsisoq: Allatsi: